asennadas

ModularIT, arquitectura orientada a servizos virtualizados

ModularIT e unha arquitectura orientada a servizos virtualizados cunha contorna engadida de monitorización e xestión. Todo iso utilizando Software Libre e orientado a administradores de sistemas.

ModularIT está formado por servizos modulares despregados en máquinas virtuais que poden combinarse coma se fora un quebracabezas o cal confire múltiples vantaxes.

Para coñecer o estado de cada servizo cando sexa necesario, ModularIT incorpora un sistema de control e xestión.

O sistema de monitorización está deseñado como axente independente instalado en cada máquina virtual que chequea e corrixe problemas e erros comúns. O sistema de monitorización é distribuído e multinivel (xerárquico) de modo que grandes organizacións poden dispor do seu propio sistema de monitorización independente ou escravo doutro, xestionado por eles mesmos ou un fornecedor externo.

ModularIT inclúe os seguintes servizos:

Copias de seguridade
LDAP
Servidor de arquivos
Correo
Mensaxería Instantánea
Telefonía
Fax
Ferramenta de traballo en grupo
Sistema de xestión de documentos
Servizos adicionais

ModularIT foi naceu debido á dispersión xeografica que hai en Canarias, polo que varias empresas desenvoleveron unha arquitectura de servizos que lles permitira ofrecer servizos TIC a terceiros da forma máis eficiente posible. Algúns dos requisitos son que o despregamento poidera ser realizado completamente en remoto cunha plataforma de xestión e monitorización dos servizos instalados.

ModularIT

Roberto Brenlla

En: AGNIX, Amizade, FLOSS, TecnoloxÃa por Roberto Brenlla
Sen Comentarios »

Spectrum vs. Tamagotchi

Non é a primeira vez que defendo as consecuencias que supón o cambio xeneracional que está a provocar unha certa crise no nivel de matriculacións en enxeñaría informática.

Podemos dar por certas as diversas fontes que sinalan tal crise. Así, hai fontes que corroboran que está a producirse unha forte caída nas matriculacións en enxeñaría. Na Universidade de Málaga sinalan que tal caída é do 43% nos últimos cinco anos, na Escola de Enxeñaría Técnica Informática de Xixón baixou un 20% nos últimos catro anos e a metade no pasado curso e segundo un estudo da Universidade Politécnica de Catalunya haberá en España un 32% menos de titulados en carreiras TIC en 2010 que no período 2005-2006.

Uns fan a pregunta «Non gusta estudar Enxeñaría Informática en España?» e algún medio sinala que tal caída tamén abrangue ás carreiras científicas (Física, Química ou Matemáticas).

Poderíase entrar na obxectividade de tales informacións pois, por exemplo, en ningún deles coméntase o que acontece con eses mesmos datos se temos presente a pirámide poboacional para eses períodos. Outros moitos factores poderíanse pór en riba desas cifras e seguramente todo ilo daría unha visión moito máis clara do que está a acontecer.

Porén a min chámame a atención un detalle, se cadra, nimio e anecdótico. Trátase dalgo que ten que ver coas xeneracións Spectrum e a máis recente xeneración Tamagotchi. Non me refiro con precisión absoluta a eses períodos dado que á do Tamagotchi aínda estará estudando bacharelato ou a ESO.

Refírome ás xentes que comezaron xogando con trebellos aos que había que meterlles man para facelos rular cos máis novos programas como acontecía con quen tivo nas súas mans algo semellante a un Spectrum, vellos PC sen conexión á rede, con contornos gráficos primitivos e así por diante. Estas persoas teñen a curiosidade necesaria por achegarse ao fondo dun kernel ou a un programa de baixo nivel.

Esa xeneración aínda non coñecía Internet pois esta fíxose realmente popular a partires da segunda metade dos noventa, xusto cando popularizábase tamén a telefonía móbil, as videoconsolas e nacía o Tamagotchi (1996). Quen na infancia xa tivera a ocasión de navegar pola rede, ter sistemas operativos con contorno gráfico amigable, unha ampla variedade de xogos e consolas, chamar por móbil e até disfrutar cun Tamagotchi terá hoxe unha idade moi próxima á adolescencia ou no tempo de escoller a súa futura profesión. Posiblemente, esta persoas disfruten máis empregando a tecnoloxía que progamando esa tecnoloxía, máis como usuarias e menos como desenvolvedoras. Posiblemente porque sempre tiveron diante interfaces gráficas amigables e unha chea de posibilidades comunicativas.

Insisto, chámame a atención esta idea aínda que, se cadra, sexa nimia e anecdótica.

Outra das motivacións, seguro que máis importante que todo o que en riba comento, pode vir da ambigüedade do termo ‘informático‘ como profesión. Hoxe auto-noméanse así quen fixo a carreira, sexa superior ou técnica, quen fixo FP ou un sinxelo curso e até quen é catalogado como «manitas» cos computadores. Isto leva tamén ao desprestixio social e a manter uns soldos baixos en relacións ás outras carreiras. Como lle dixeron ao amigo Óscar «un informático pode ser calquera«.

Roberto Brenlla

En: AGNIX, Amizade, FLOSS, Pensamento por Roberto Brenlla
Sen Comentarios »

Velocidade de resposta ante problemas de seguridade

Slashdot sinala que vendedores de software privativo, neste caso Microsoft e Cisco, finalmente publicaron os seus parches para vulnerabilidades no protocolo TCP tras un ano de coñecerse! Esas vulnerabilidades afectaban a todos os dispositivos de Cisco que executasen o software IOS e un elevado número de sistemas Microsoft, tanto servidores como de escritorio. Esta última empresa aínda está sen dar solución a esa vulnerabilidade para algúns dos seus sistemas.

É certo que calquera sistema pode comprometerse debido ás vulnerabilidades. Maila certeza desa premisa, xorde a cuestión: canto demoran os responsables deses sistemas en arranxalas? No bando do Sw Libre, sonado foi o caso de Debian pois non se decatara dunha delas en dous anos. Iso si, cando se soubo arranxouse decontado. Fóra dese caso, en SwL a velocidade de reacción adoita ser case que inmediata. Así, perante un exploit no kernel 2.6 as 10 maiores distros GNU/Linux resolvérono en menos de 48 horas. O mesmo pode dicirse nos casos de phishing e outros males do navegador Firefox xa que logo en horas adoitan ser arranxados.

Se cadra unha boa proba da seguridade que nos outorgan os sistemas libres sexa que o propio Comité para os Servizos Armados dos EE.UU. recomenda ao Departamento de Defensa dese país «considerar o uso de software aberto pola redución de custos e a seguridade do mesmo«. Outros bos exemplos poden ser as bolsas de valores ou a banca.

Roberto Brenlla

En: AGNIX, FLOSS, Internet, Seguridade por Roberto Brenlla
Sen Comentarios »

OpenShot, doado editor de video

Jonathan Thomas sinala no sitio de OpenShot:

«Teño unha misión sinxela: crear un editor de video non lineal e de código aberto para Linux. Moita xente intentou e fallou antes ca min, pero por algunha razón síntome obrigado a intentalo eu mesmo. Estou documentando a miña viaxe neste blog para que todos lean. Será unha viaxe arriscada e pode que non regrese con vida. Agárrate forte e disfruta da viaxe. Polo de agora, estou a chamar este proxecto OpenShot Video Editor!«

Nestas alturas de desenvolvemento este editor xa acada un alto nivel de usabilidade. Tamén inclúe varias funcionalidades dignas de editores maiores como:

Soporte a diversos formatos de video, audio e imaxe (baseado en FFmpeg)
Integración con Gnome (soporte de ‘arrastrar e soltar’ ou ‘drag and drop‘)
Múltiples pistas
Redimensionado, recortado, snapping…
Transicións de video con previsualizacións en tempo real
etc.

Tes a túa disposición diversos paquetes preparados. Por exemplo, para unha CPU de 32 bits con Ubuntu 8.10 os pasos a dar serían:

Descarga o paquete openshot.
Descarga o paquete de dependencias e descomprímeo. No directorio que inclúe os paquetes deb fai: sudo dpkg -i openshot-*
Logo instala á vez uns paquetes que has necesitar: sudo apt-get install libgoocanvas3 libgoocanvas-common python-pygoocanvas
Por último, vaite a onde teñas o binario principal e instálao: sudo dpkg -i openshot.deb
Tes a opción de instalar tamén paquetes para obter a interfaz traducida (castelán, portugués…).

Roberto Brenlla

En: AGNIX, FLOSS por Roberto Brenlla
Sen Comentarios »

Instalacións masivas automatizadas con SystemImager

Sei de SystemImager pola resposta que deu o amigo Óscar Casal nunha lista de correo. SystemImager é un programa que automatiza instalacións masivas de GNU/Linux, distribución de software e implantacións de produción.

Segundo a súa wiki, SystemImager fai máis doado a automatización de instalacións (clons), distribución de software, distribución de contidos ou datos, cambios de configuración e actualizacións do sistema operativo na túa rede de máquinas GNU/Linux. Até podes actualizar cara unha nova versión de GNU/Linux!

Tamén pode ser usado para garantir implantacións de produción segura. Ao gardar a imaxe actual dunha produción antes de actualizar cara a nova imaxe de produción, tamén tes con ilo un mecanismo de continxencia altamente confiable. Se o contorno da nova producción é errada, simplemente fas un roll-back cara a anterior imaxe cun sinxelo comando.

Algúns casos típicos de uso: granxas de servidores de Internet, granxas de servidores de base de datos, clusters de alto rendemento, laboratorios de informática e ambientes de escritorio corporativo.

Tes este artigo explicando como instalalo e mailos casos máis comúns.

Roberto Brenlla

En: AGNIX, Amizade, FLOSS, Seguridade por Roberto Brenlla
Sen Comentarios »

Educación migrará plataforma de correo-e a SwL

O DOG nº 171 publica unha resolución do 24 de agosto de 2009, da Secretaría Xeral da Consellería de Educación e Ordenación Universitaria, pola que se anuncia a licitación, mediante procedemento aberto e tramitación urxente, para a contratación do servizo de migración da plataforma de correo electrónico corporativo desta consellería a unha arquitectura baseada en software libre.

A dependencia que tramita o expediente é Subdirección Xeral de Sistemas Informáticos e só hai dez días contados ata a data límite de presentación. O importe é 180.000 €.

Máis datos no DOG nº 171 do pasado martes 1 de setembro de 2009, páxina 14.241 e na páxina dos pregos relativos.

Roberto Brenlla

En: AGNIX, FLOSS, Galicia-Galiza, Negocios por Roberto Brenlla
Sen Comentarios »

Software Libre e a Lingüística (Lingua 09) na USC

A Oficina de Software Libre da Universidade de Santiago de Compostela organiza entre os días 21 e 24 de setembro o curso “O Software Libre e a Lingüística (Lingua 09)”.

Este seminario, enmarcado no programa de cursos de verán da USC, ten como principal obxectivo expoñerlles aos asistentes unha visión xeral da interelación entre o software libre e informática xeral coa investigación filolóxica e lingüistica, tanto no análise de datos como nas canles creadas neste eido e os mecanismos de traballo asociados.

Segundo isto, as conferencias serán exposicións teóricas que abranguerán os diferentes aspectos e axentes implicados, sendo impartidas por recoñecidos referentes profesionais das múltiples áreas- empresas, universidades e asociacións.

O curso está dirixido a un público xeralista se ben será de especial interese a aquelas persoas que académica ou persoalmente están ligadas a proxectos de tradución e investigación lingüística, podendo asistir tanto alumnado e persoal da universidade como persoas externas á universidade.

As xornadas impartiranse na Facultade de Filoloxía, sumando ata un total de 16 horas lectivas. Os interesados deberán matricularse antes do día 11 de setembro, segundo os procedementos estabelecidos pola USC.

“O Software Libre e a Lingüística (Lingua 09)” inscríbese no marco dos Cursos de Verán da USC promovidos pola Vicerreitoría de Cultura da Universidade de Santiago de Compostela. Os/as asistentes terán dereito a un diploma no que constarán o título do curso, o número de horas e a asistencia. Para os/as estudantes da USC, este curso será recoñecible como 1 crédito de libre configuración.

Inscríbete!

Roberto Brenlla

En: AGNIX, Cultura Libre, Eventos, FLOSS, Galicia-Galiza por Roberto Brenlla
Sen Comentarios »

Mercado de Sw Libre medrará a ritmo de 22,4% anual

A consultora IDC vén de publicar un informe amosando unha óptima perspectiva para o Sw Libre e mailo Open Source. Concretamente sinala:

«Os ingresos mundiais debidos ao software de código aberto (OSS, open source software) medrará a unha taxa dun 22,4% de crecemento anual composto ata acadar os US $ 8.100 millóns en 2013. Esta previsión é considerablemente maior cá feita en 2008, por tres razóns:

(1) a lista empregada para calcular os ingresos ampliouse grazas a un amplo esforzo de incluir máis proxectos neste pronóstico;

(2) o Software Libre acadou un grao de aceptación nos pasados 12 meses moito maior có esperado; e

(3), a economía acelerou a absorción e uso de software de fontes abertas no derradeiros meses de 2008.»

«O software de fontes abertas acadou un forte impulso no mercado a partir da actual crise económica«, dixo Michael Fauscette de Software Business Solutions. «OSS é cada vez máis unha parte da estratexia empresarial en software nas empresas líderes e está a ter un bo ritmo de adopción nas súas infraestruturas principais. Mentres a industria global de software segue a consolidarse, será clave para as empresas fornecedoras de OSS conquerir axeitada dimensión se estas planexan continuar como un negocio autónomo.«

IDC cita á economía como o motivo polo cal a súa predición sinala un aumento nos ingresos do software de fontes abertas. Dado que é unha previsión a longo prazo (2013), posiblemente comprobemos que, en xeral, as empresas demandarán máis estas tecnoloxías independentemente dos cambios na economía.

IDC vincula tamén outra razón para o aumento da súa optimista previsión para o mercado do software de fontes abertas. «Os grandes fornecedores de software coma IBM, Sun, Dell, HP e Oracle están obtendo cantidades significativas de ingresos indirectos das súas actividades neste sector e mailo seu apoio ao OSS. Isto axudou moito na aceptación xeneralizada que agora ten o OSS.«

Fonte.

Roberto Brenlla

En: AGNIX, FLOSS, Negocios por Roberto Brenlla
Sen Comentarios »

Invidente bloguea grazas ao Sw Libre

Unha vez máis, sei por Fernando Acero que o invidente Nicomedes Flores pode, e feito é, un activo blogueiro grazas ao uso de Software Libre. Nomeadamente emprega o programa Orca baixo unha Ubuntu GNU/Linux. Con el traballa coa súa computadora (procesador de textos, chat…) e conéctase co mundo.

Orca (segundo o seu Wiki) é unha tecnoloxía de apoio libre/código aberto, flexible, extensible e potente para persoas invidentes ou con deficiente visión. Empregando varias combinacións de voz, braille e magnificación, Orca axuda a proporcionar accesibilidade ás aplicacións e ferramentas que soporten AT-SPI (por exemplo o escritorio libre GNOME).

Nicomedes, director do Centro de Rehabilitación para Persoas Cegas Manuela Garandillas en Cochabamba (Bolivia), usa unha opción da plataforma de Blogger que permite mandar un novo artigo, ler comentarios e respostalos, todo a través de mensaxes de correo-e. Tamén participa no Proxecto Accesibilidade onde un grupo de activistas de Software Libre de Bolivia implementan solucións libres para as persoas con discapacidade.

Comproba como o fai:

Concordo con Fernanco Acero na mágoa que supón a escaseza de investimentos nesta materia de poderosas organizacións como a ONCE.

Roberto Brenlla

En: AGNIX, Curiosidades, FLOSS por Roberto Brenlla
Sen Comentarios »

Creando USB con Ubuntu desde M$

Aproveito que hei dar unha xornada sobre SwL onde os equipos non teñen nin arranque dual nin SwL instalado, só software privativo de M$.

Para ilo preparei estas instrucións:

1.- descarga o arquivo ‘.iso’ que contén a Ubuntu 9.04 Jaunty.
2.- Segue os pasos deste artigo.
3.- Ese artigo di que descargues a aplicación uSbuntu.
4.- Seguindo os pasos de (2), verás que xa o tes todo: a ‘iso’ (1) e
mailo programiña (3) que che pedirá todo. Tes que instalar ese programa
(3) tras descomprimilo, executando «uSbuntu Live Creator.exe«
5.- Para os «datos persistentes» proba poñer 250 ou 300 MB se tes unha USB
de 1 GB pois pode haber ese espazo libre.
6.- Rematado o proceso, logo fai:
6.1.- Deixa o USB conectado
6.2.- Arranca o PC e entra na BIOS
6.3.- Selecciona que arranque por USB
6.4.- Garda e reinicia
6.5.- Terá que arrancar xa polo USB e coa Ubuntu 9.04 en modo «live«, é
dicir, sen mexer para nada no sistema instalado.

Roberto Brenlla

En: AGNIX, FLOSS, Relatorios por Roberto Brenlla
Sen Comentarios »

CNTG oferta varios cursos sobre Sw Libre

O Centro de Novas Tecnoloxías de Galicia (CNTG) vén de anunciar a súa oferta formativa para o período outubro 2009 a xuño 2010.

Dentro desa oferta hai varios cursos sobre Sw Libre. Velaquí estes cursos xunto a outros xenéricos:

Administración avanzada de sistemas operativos Linux (certificación LPIC 2), 64 hs, obtense certificación, data 26/10/2009, imparte IBM
Administración de sistemas operativos Linux (certificación LPIC 1), 80hs, obtense certificación, data 27/10/2009, IBM
Goberno corporativo das TIC. Fundamentos de Cobit e implantación de IT governance, 21hs, sen certificación, data 06/11/2009
Fundamentos de ITIL (Vigo), 20hs, obtense certificación, data 06/11/2009, ITIL
Fundamentos de ITIL (A Coruña), 20hs, obtense certificación, data 20/11/2009 ITIL
Administración de S.O. Red Hat Linux – Nivel Certified Engineer. Certificación RHCT RHCE, 64hs, obtense certificación, data 25/01/2010, Red Hat
Administración de S.O. Red Hat Linux – Nivel Certified Engineer. Certificación RHCT RHCE, 80hs, obtense certificación, data 26/01/2010, Red Hat
Dirección de proxectos informáticos (Certificación CAPM) – Vigo, 36hs, obtense certificación, data 29/01/2010, PMI
Administración de bases de datos MySQL, 48hs, obtense certificación, data 01/03/2010, MySQL
Desenvolvemento de aplicacións WEB con PHP e MySQL sobre Apache, 80hs, obtense certificación, data 06/04/2010, MySQL
Implementación de VoIP con Asterisk, 36hs, sen certificación, data 03/05/2010, ASTERISK

Podes descargar o folleto informativo.

Roberto Brenlla

En: AGNIX, EstÃ¡ndares, FLOSS, Galicia-Galiza, Negocios, ProgramaciÃ³n, TecnoloxÃa por Roberto Brenlla
1 Comentario »

Interoperabilidade e Administración Electrónica (carta aberta de Hispalinux)

Hispalinux vén de publicar unha Carta Aberta a prol dunha Administración Electrónica Transparente, Independente e Democrática.

A Administración Electrónica pode crear as bases dunha nova era da nosa democracia, revalorizar o papel da cidadanía e reformar «por fin» participativamente a función pública.

Con todo, a posibilidade de que o emprego masivo de tecnoloxías dixitais conduza precisamente ao contrario, desencadeando unha concentración de poder sobre a información pública e unha dificultade insuperable de control das institucións, obriga a Hispalinux a reivindicar con toda enerxía que se garanta a máxima información e participación na regulación destas materias que son os alicerces mesmos da nosa sociedade.

Falta de transparencia
Nesta ocasión, o proxecto dunha norma fundamental, o Real Decreto polo que se regulará o Esquema Nacional de Interoperabilidade foi levado por canles que facían case imposible calquera debate da cidadanía e que exclusivamente permitían a participación de grupos de intereses.

Con grave risco Hispalinux rompeu esa cadea de silencio e publicou o documento que se mantiña oculto, o proxecto de norma. Asemade, Hispalinux invitou á cidadanía a efectuar alegacións, algo que necesariamente debería saír dos nosos representantes no Goberno.

Hispalinux recorda que este indebido segredo erosiona a confianza na integridade e imparcialidade dos procesos regulatorios, nun ámbito onde a transparencia debese primar sobre calquera outra consideración no balance do resultado normativo.

Conclusións de Hispalinux
Como resultado da nosa propia análise e as alegacións ata agora efectuadas, Hispalinux fai públicas as seguintes conclusións que deberían mover ás nosas autoridades a reformularse o presente proxecto de Real Decreto:

En: AGNIX, EstÃ¡ndares, FLOSS, Negocios por Roberto Brenlla
Sen Comentarios »

« Páxina anterior — Páxina seguinte »