asennadas

Bob Sutor, vicepresidente de negocio Open Source e Linux en IBM, deu o relatorio inaugural da recentemente concluída LinuxCon 2009 e nel deixou algunhas ideas sobre o seu parecer arredor do futuro de GNU/Linux no escritorio.

Para ilo deseñou estes potenciais escenarios:

• GNU/Linux destacándose, probablemente tendo unha distro dominando os escritorios
• GNU/Linux acadando paridade con M$ e Apple
• GNU/Linux desaparecendo dos escritorios

Sutor cre que a maioría da xente di: «Non quero que me molesten. Iso simplemente funciona. Quero facer o meu traballo e irme a casa«. Daí que Sutor conclúa que «facer unha substitución completa do escritorio é unha ruela sen saída» e que, polo tanto, é un erro intentar convencer ás persoas para que usen algo no cal non están interesadas. «Non desperdicien o seu tempo«, aconsella.

Ao mesmo tempo Sutor suxire á comunidade que enfoque a súa estratexia noutros nichos onde os seus esforzos teñan unha mellor oportunidade de acadar éxito, como os contornos virtualizados. E un exemplo dalguén que sen dúbida se está tomando moi en serio a potencialidade doutros nichos é Intel coa súa iniciativa Moblin.

Podes ampliar máis disto na fonte e máis na nova orixinal.

Opinión

Certo é que hai un factor determinante en todo isto: o costume. Quen está afeito a un xeito de traballar sabe que un cambio de contorno halle supoñer un esforzo, mínimo (considero) pero esforzo ao fin. Ademais é certo que estamos a tratar cunha xeneración á que a tecnoloxía informática chegou de xeito pouco natural. Moitas persoas, atrévome a dicir que a maioría, non navegaba hai unha década e outras moitas foron autodidactas aprendendo a traballar coas aplicacións informáticas. Polo tanto o medo ao cambio é lóxico e natural.

Porén, explicar con claridade as vantaxes do cambio, apoialo con formación e acompañalos nos seus primeiros pasos no novo contorno semella ser determinante para acadar o éxito perseguido por quen promove o cambio. De feito esa é unha mostra da estratexia que empregamos en TEGNIX perante calquera proceso integrador de tecnoloxías libres.

Moitos xa sabedes que penso que no eido particular considero que cada quen pode empregar o que considere apropiado maila aconsellar SwL, está claro. No eido empresarial o SwL supón un monte de vantaxes competitivas e daquela considero que é unha escolla estratéxica e decisiva. No eido público, con total certeza, só se pode promover e dar os pasos necesarios para o seu emprego na totalidade das súas dependencias e usos.

Os múltiples casos de éxito de integracións de tecnoloxías libres fanme concluir que «Si» compensa esforzarse, até se hai desinterese. Abonda con seguir unha planificación estratéxica adecuada e ben medida para cada caso.

Todo isto sen afondar nos múltiples puntos nos que pagaría a pena entrar ou salientar. Se cadra nun seguinte artigo…

Roberto Brenlla

Ao longo das vindeiras semanas Igalia estará presente nos campus universitarios das tres universidades galegas para presentar o Premio ao mellor PFC con Software Libre. Durante a presentación explicaranse os obxectivos e bases desta iniciativa. As datas son as seguintes:

• 30 de Setembro ás 10:00. Santiago de Compostela, Escola Técnica Superior de Enxeñería.
• 30 de Setembro ás 16:30. Vigo, Escola Técnica Superior de Enxeñeiros de Telecomunicación.
• 01 de Outubro ás 12:30. Ourense, Escola Superior de Enxeñería Informática.
• 06 de Outubro ás 12:00. A Coruña, Facultade de Informática.

Roberto Brenlla

Nas listas de correo Softlibre-edugal Vili Cedeira puxo unha atractiva mensaxe da súa experiencia clonando equipos grazas a este artigo que amosa como clonar equipos con DRBL e Clonezilla. Parte desa mensaxe di:

«Eu conseguín clonar 14 equipos DELL 740 á vez (todo o disco duro, cunha partición de windows e outra de linux) nun tempo récord de 9 minutos (unha vez que comeza a transferencia de datos). A verdade é que me quedei abraiado!!! Nin un sóo erro!!! O switch e tarxetas de rede traballan a 1000 MHz. Se seguides o manual, atoparedes que a distribución LIVE Linux que se utilizou no proceso descrito non existe xa, pero si unha superior en: http://free.nchc.org.tw/drbl-live/stable/

Isto aforra moitísimas horas de traballo frente a clonación con outros sistemas que van dun en un, como o Norton Ghost (máis dunha hora por ordenador).»

Unha vez máis, outro exemplo de colaboración e o SwL indo da man.

DRBL e Clonezilla.

Roberto Brenlla

Hoxe, 19 de setembro, é o dia elixido este ano 2009 para a celebración do Software Freedom Day, o Dia da Liberdade do Software.

Este ano o Equipo Galicia ten rexistrado como evento un da Comunidade O Zulo coincidindo coa VI Edición de Kernel 2009.

O SFD naceu en 2004. Persoalmente chamoume a atención e decidín facer o rexistro do equipo galego pois daquela éramos apenas testimoniais os grupos rexistrados. De feito non había equipos nin en España nin en moitos outros países desenvolvidos. A partir daí comezaron a rexistrarse equipos e a aparecer celebracións. As galegas podes velas aquí, organizadas no 2006, 2007 e 2008 por GALPon.

Roberto Brenlla

O vindeiro martes día 6 de outubro ás 17:00 hs terá lugar nas instalacións do Centro de Novas Tecnoloxías de Galicia, unha «Xornada técnica sobre solucións de Virtualización Red Hat orientada a servidores» que incluirá exemplos prácticos e teóricos.

A xornada está orientada a perfís técnicos de profesionais, administradores, responsables ou futuros responsables de sistemas, partners de Red Hat, alumnado do CNTG, etc .

Amplía a información consultando o folleto informativo. Podes inscribirte nesta ligazón.

A asistencia á xornada é libre e gratuita, condicionada  á previa inscrición e aforo do local. O evento é organizado por Red Hat en colaboración co Centro de Novas Tecnoloxías de Galicia da Consellería de Traballo e Benestar.

Roberto Brenlla

Inaugúrase hoxe no Parque Tecnolóxico de Andalucía (PTA) de Málaga a I Feira «Software Libre a tu alcance«, un atractivo evento que ten como obxectivo ofrecer demostracións de produtos e servizos con casos reais de aplicación, o cal permitará ao público avaliar a idoneidade do Software Libre.

Este atractivo enfoque complementarase coa organización de encontros empresariais entre aquelas que aínda non estean familiarizadas coas solucións baseadas en software libre e mailas altamente especializadas como as que integran ASOLIF, oficialmente presente nesta feira. Para ilo haberá persoal dinamizador responsable de presentar e guiar o público asistente cara os expositores máis axeitados ao seu interese.

Paralelamente haberá obradoiros de curta duración con temática diversa, amosando desde escritorios básicos a sistemas complexos. Con estes obradoiros búscase concienciar ás empresas que aínda non consideran o software libre como alternativa posto que poderán comprobar as múltiples e importantes vantaxes que teñen estas tecnoloxías.

Máis información en ASOLIF e na páxina de CREA (Centro de Referencia para la Excelencia en Entornos Abiertos).

Roberto Brenlla

O CNTG amplia a súa oferta formativa incluindo na súa programación a impartición dun curso de Creación dixital en 3D con Blender (PDF). A apertura do prazo de inscrición terá lugar o vindeiro día 1 de novembro, estando previsto para o 25 de xaneiro, de luns a venres e en xornadas de mañá, o inicio da acción formativa.

Para máis información consulte a ficha do curso accedendo á sección formación do menú actividades do CNTG.

O curso será dado por Antonio Carranza contratado por TEGNIX.

Roberto Brenlla

Ford anuncia un software construído a partir de código aberto. O que isto significa para Ford non está moi claro pero é interesante comprobar o esforzo que a multinacional adica a estas verbas no seu anuncio. Con certeza, o código aberto (open source) fóra do ámbito da informática é observado como algo absolutamente positivo sinala a fonte desta nova.

Ford aproveita a tecnoloxía do avión de combate F22 para o seu novo modelo Taurus. Esta tecnoloxía está destinada a evitar os accidentes avisando acusticamente xunto a unha alarma de voz no sistema de navegación e prendendo luces vermellas cando o vehículo se atope moi preto doutro. Inclúense tamén outras funcioanalidades como MyKey válido para o control do coche cando se desexe limitar velocidades máximas.

Crese que se este dispositivo de aviso de colisión estivera equipado no ano pasado nos vehículos norteamericanos podería ter salvado 7.000 vidas, sinalan fontes de Ford á BBC.

A tecnoloxía pode ler a estrada e identificar árbores e persoas. Engadíronse algoritmos específicos para determinar se os obxectos son ou non un «vehículo-obxectivo».

Paga a pena lembrar que este esforzo de Ford por retomar os postos perdidos no liderado na industria automobilística segue a corrente encabezada por BMW e outras compañías coa súa plataforma aberta GENIVI.

Outra curiosa iniciativa é a do Fiat Mio, anunciado como o primeiro coche Creative Commons.

Roberto Brenlla

ModularIT e unha arquitectura orientada a servizos virtualizados cunha contorna engadida de monitorización e xestión. Todo iso utilizando Software Libre e orientado a administradores de sistemas.

ModularIT está formado por servizos modulares despregados en máquinas virtuais que poden combinarse coma se fora un quebracabezas o cal confire múltiples vantaxes.

Para coñecer o estado de cada servizo cando sexa necesario, ModularIT incorpora un sistema de control e xestión.

O sistema de monitorización está deseñado como axente independente instalado en cada máquina virtual que chequea e corrixe problemas e erros comúns. O sistema de monitorización é distribuído e multinivel (xerárquico) de modo que grandes organizacións poden dispor do seu propio sistema de monitorización independente ou escravo doutro, xestionado por eles mesmos ou un fornecedor externo.

ModularIT inclúe os seguintes servizos:

• Copias de seguridade
• LDAP
• Servidor de arquivos
• Correo
• Mensaxería Instantánea
• Telefonía
• Fax
• Ferramenta de traballo en grupo
• Sistema de xestión de documentos
• Servizos adicionais

ModularIT foi naceu debido á dispersión xeografica que hai en Canarias, polo que varias empresas desenvoleveron unha arquitectura de servizos que lles permitira ofrecer servizos TIC a terceiros da forma máis eficiente posible. Algúns dos requisitos son que o despregamento poidera ser realizado completamente en remoto cunha plataforma de xestión e monitorización dos servizos instalados.

ModularIT

Roberto Brenlla

Non é a primeira vez que defendo as consecuencias que supón o cambio xeneracional que está a provocar unha certa crise no nivel de matriculacións en enxeñaría informática.

Podemos dar por certas as diversas fontes que sinalan tal crise. Así, hai fontes que corroboran que está a producirse unha forte caída nas matriculacións en enxeñaría. Na Universidade de Málaga sinalan que tal caída é do 43% nos últimos cinco anos, na Escola de Enxeñaría Técnica Informática de Xixón baixou un 20% nos últimos catro anos e a metade no pasado curso e segundo un estudo da Universidade Politécnica de Catalunya haberá en España un 32% menos de titulados en carreiras TIC en 2010 que no período 2005-2006.

Uns fan a pregunta «Non gusta estudar Enxeñaría Informática en España?» e algún medio sinala que tal caída tamén abrangue ás carreiras científicas (Física, Química ou Matemáticas).

Poderíase entrar na obxectividade de tales informacións pois, por exemplo, en ningún deles coméntase o que acontece con eses mesmos datos se temos presente a pirámide poboacional para eses períodos. Outros moitos factores poderíanse pór en riba desas cifras e seguramente todo ilo daría unha visión moito máis clara do que está a acontecer.

Porén a min chámame a atención un detalle, se cadra, nimio e anecdótico. Trátase dalgo que ten que ver coas xeneracións Spectrum e a máis recente xeneración Tamagotchi. Non me refiro con precisión absoluta a eses períodos dado que á do Tamagotchi aínda estará estudando bacharelato ou a ESO.

Refírome ás xentes que comezaron xogando con trebellos aos que había que meterlles man para facelos rular cos máis novos programas como acontecía con quen tivo nas súas mans algo semellante a un Spectrum, vellos PC sen conexión á rede, con contornos gráficos primitivos e así por diante. Estas persoas teñen a curiosidade necesaria por achegarse ao fondo dun kernel ou a un programa de baixo nivel.

Esa xeneración aínda non coñecía Internet pois esta fíxose realmente popular a partires da segunda metade dos noventa, xusto cando popularizábase tamén a telefonía móbil, as videoconsolas e nacía o Tamagotchi (1996). Quen na infancia xa tivera a ocasión de navegar pola rede, ter sistemas operativos con contorno gráfico amigable, unha ampla variedade de xogos e consolas, chamar por móbil e até disfrutar cun Tamagotchi terá hoxe unha idade moi próxima á adolescencia ou no tempo de escoller a súa futura profesión. Posiblemente, esta persoas disfruten máis empregando a tecnoloxía que progamando esa tecnoloxía, máis como usuarias e menos como desenvolvedoras. Posiblemente porque sempre tiveron diante interfaces gráficas amigables e unha chea de posibilidades comunicativas.

Insisto, chámame a atención esta idea aínda que, se cadra, sexa nimia e anecdótica.

Outra das motivacións, seguro que máis importante que todo o que en riba comento, pode vir da ambigüedade do termo ‘informático‘ como profesión. Hoxe auto-noméanse así quen fixo a carreira, sexa superior ou técnica, quen fixo FP ou un sinxelo curso e até quen é catalogado como «manitas» cos computadores. Isto leva tamén ao desprestixio social e a manter uns soldos baixos en relacións ás outras carreiras. Como lle dixeron ao amigo Óscar «un informático pode ser calquera«.

Roberto Brenlla

Slashdot sinala que vendedores de software privativo, neste caso Microsoft e Cisco, finalmente publicaron os seus parches para vulnerabilidades no protocolo TCP tras un ano de coñecerse! Esas vulnerabilidades afectaban a todos os dispositivos de Cisco que executasen o software IOS e un elevado número de sistemas Microsoft, tanto servidores como de escritorio. Esta última empresa aínda está sen dar solución a esa vulnerabilidade para algúns dos seus sistemas.

É certo que calquera sistema pode comprometerse debido ás vulnerabilidades. Maila certeza desa premisa, xorde a cuestión: canto demoran os responsables deses sistemas en arranxalas? No bando do Sw Libre, sonado foi o caso de Debian pois non se decatara dunha delas en dous anos. Iso si, cando se soubo arranxouse decontado. Fóra dese caso, en SwL a velocidade de reacción adoita ser case que inmediata. Así, perante un exploit no kernel 2.6 as 10 maiores distros GNU/Linux resolvérono en menos de 48 horas. O mesmo pode dicirse nos casos de phishing e outros males do navegador Firefox xa que logo en horas adoitan ser arranxados.

Se cadra unha boa proba da seguridade que nos outorgan os sistemas libres sexa que o propio Comité para os Servizos Armados dos EE.UU. recomenda ao Departamento de Defensa dese país «considerar o uso de software aberto pola redución de custos e a seguridade do mesmo«. Outros bos exemplos poden ser as bolsas de valores ou a banca.

Roberto Brenlla

Jonathan Thomas sinala no sitio de OpenShot:

«Teño unha misión sinxela: crear un editor de video non lineal e de código aberto para Linux. Moita xente intentou e fallou antes ca min, pero por algunha razón síntome obrigado a intentalo eu mesmo. Estou documentando a miña viaxe neste blog para que todos lean. Será unha viaxe arriscada e pode que non regrese con vida. Agárrate forte e disfruta da viaxe. Polo de agora, estou a chamar este proxecto OpenShot Video Editor!«

Nestas alturas de desenvolvemento este editor xa acada un alto nivel de usabilidade. Tamén inclúe varias funcionalidades dignas de editores maiores como:

• Soporte a diversos formatos de video, audio e imaxe (baseado en FFmpeg)
• Integración con Gnome (soporte de ‘arrastrar e soltar’ ou ‘drag and drop‘)
• Múltiples pistas
• Redimensionado, recortado, snapping…
• Transicións de video con previsualizacións en tempo real
• etc.

Tes a túa disposición diversos paquetes preparados. Por exemplo, para unha CPU de 32 bits con Ubuntu 8.10 os pasos a dar serían:

1. Descarga o paquete openshot.
2. Descarga o paquete de dependencias e descomprímeo. No directorio que inclúe os paquetes deb fai: sudo dpkg -i openshot-*
3. Logo instala á vez uns paquetes que has necesitar: sudo apt-get install libgoocanvas3 libgoocanvas-common python-pygoocanvas
4. Por último, vaite a onde teñas o binario principal e instálao: sudo dpkg -i openshot.deb
5. Tes a opción de instalar tamén paquetes para obter a interfaz traducida (castelán, portugués…).

Roberto Brenlla