asennadas

Onte escribín un artigo sobre o «dilema» Mono ofrecendo o parecer de Richard Stallman e, de estares de acordo co seu discurso, tamén daba o método para eliminalo do teu sistema.

Moitas distros inclúen Mono na súa instalación por defecto, entre elas OpenSUSE, Debian e Ubuntu. Velaquí a posición que ten Ubuntu sobre o asunto Mono, o proxecto de código aberto iniciado por Ximian e actualmente impulsado por Novell (tras a adquisición de Ximian) para crear un grupo de ferramentas libres, baseadas en GNU/Linux e compatibles con .NET segundo o especificado polo ECMA ( European Computer Manufacturers Association), segundo a Wikipedia-es.

En nome de Canonical e do Corpo Técnico de  Ubuntu, Scott James Remnant emitíu un comunicado respecto a Mono. A legalidade de Mono é a miúdo unha preocupación esencial para quen defende o Software Libre de patentes e outra propiedades intelectuais que pertencen a Microsoft.  Pois ben, maila todo o acontecido, Ubuntu decidiu reafirmarse na súa posición respecto a Mono.

Mono é unha parte integral de Ubuntu dado que F-Spot, Tomboy e outras aplicacións dependen da implementación libre de C# /. Net. Nestes intres, porén, Ubuntu non ten problemas co proxecto Mono e continuará tendo Mono como parte do seu sistema principal de paquetes. Dado que Ubuntu e outros proxectos de software libre non recibiron aínda ningún aviso legal por infrinxir ningunha propiedade intelectual, eles han seguir empregando Mono porque, ademais, cumprir coa legalidade é unha prioridade no proxecto Ubuntu.

Souben da postura de Ubuntu por esta fonte.

Agora que tes o parecer de dúas partes, podes tomar daquela a túa propia opinión ao respecto.
asennadas

En: AGNIX, FLOSS, Hasefroch, Historia(s), Seguridade por Roberto Brenlla
1 Comentario »

Richard M. Stallman comenta:

A decisión de Debian de incluir Mono na súa instalación predeterminada, pongamos por caso que debido a que Tomboy está escrito en C#, leva á comunidade a unha dirección arriscada. É perigoso depender de C#, polo tanto preciso desanimar o seu uso.

O problema non só é debido a Mono xa que logo calquera implementación libre de C# tería o mesmo trato. O perigo é que Microsoft está planexando forzar a toda implementación libre de C# a moverse ilegalmente polo emprego de patentes de software. (Olla http://swpat.org e http://progfree.org.) Este é un serio perigo, e só os aparvados deberían ignoralo ata que algún dia iso aconteza. Precisamos tomar precaucións agora para protexernos dun vindeiro perigo.

Se concordas con esta visión, podes desisntalar Mono e todas as súas dependencias executando este comando (en Debian, Ubuntu e similares):
sudo apt-get remove --purge mono-common libmono0 libgdiplus
&& sudo rm -rf /usr/lib/mono

tal e como sinala este HOWTO. A máis hanse desisntalar algunhas aplicacións como Tomboy, Banshee, F-Spot ou Gnome Do.

Fonte.
asennadas

En: AGNIX, FLOSS, Seguridade por Roberto Brenlla
4 Comentarios »

Como mostra da festividade que supuxo a celebración do emblemático X FISL deixo este video feito por Augusto Campos amosando o baile de Stallman co GNU:

Tes máis informacións na fonte, tamén fotos.
asennadas

En: AGNIX, Brasil, Curiosidades, Eventos, FLOSS por Roberto Brenlla
2 Comentarios »

O pasado xoves (30 de abril de 2009) estivo na Fundación Caixanova o fundador do proxecto GNU, Richard Stallman. O recinto tiña cabida para 500 persoas, o cal deixouno ben ao límite de capacidade tralos axustes por inscritos que finalmente non viñeron. Segundo a organización, ao terceiro de dia da apertura do formulario de inscrición computábanse xa máis de trescentas persoas e, polo tanto, o éxito só pode ser calificado como absoluto.

Con tanto público presente ateigando a sala, foi doado atopar moita xente amiga, afeccionados, neófitos, curiosos ou até algunha persoa do lado escuro.

Deixo un video de 18 segundos coa bendición de san iGNUcio:

Trala primeira conferencia repartíronse os diplomas do máster de SwL da Fundación Caixanova e decontado a segunda intervención de Stallman sobre os perigos das patentes, contando xa con menos público e, se cadra, con menos éxito na súa exposición.

asennadas

En: AGNIX, Amizade, Eventos, FLOSS, Galicia-Galiza por Roberto Brenlla
1 Comentario »

Aproveitando a segunda xira de Richard Stallman (Galipedia, máis na Wikipedia-en) por terras galegas e a que estou lendo un libro que me recomendou Javier de la Cueva, vou dar unhas pinceladas á biografía de Martin Lutero (1483-1546). Confío que igual cá xente coa que xa compartín esta idea, con só mencionar uns detalles da súa vida, atopes moitas e asombrosas semellanzas entre os dous.

Cando Lutero cravou as súas noventa e cinco teses na porta da igrexa de Todos os Santos de Wittenberg o 31 de outubro de 1517, non imaxinaba que aquilo ía provocar unha escisión de tal calibre na orde relixiosa imperante representada pola Igrexa, a católica ou universal. De feito era moi habitual entre os cregos iniciar debates deste xeito.

Lutero non sospeitaba que diversas copias das súas 95 teses circularan con gran rapidez. Isto foi posible grazas á aparición, uns cuarenta anos antes, da imprenta móbil de Guttemberg quen ademais tivo que perfeccionar o papel, modificar a tinta e formar a artesáns. Antes facíanse copias, existían imprentas, pero a de Guttemberg foi a que asentou as bases da nova técnica de impresión. Axiña houbo unha centea desas imprentas e antes do comezo do século XVI reproducíronse 40.000 edicións distintas, aproximadamente uns nove millóns de exemplares. Nada comparable co pasado.

Coas 95 teses Lutero pretendía debatir sobre a práctica común das indulxencias, «unha especie de cheque certificado estendido polo Papa á conta do tesouro de mérito acumulado polos santos«. Ao seu criterio, o único tesouro da Igrexa era o Evanxelio. Porén, séculos antes de Lutero houbo moita xente que desexaba atinxir a idea de «voltar á Igrexa primitiva«, mais non poideron con ese obxectivo.

Lutero chegou a mandarlle dúas copias ao Papa mentras seguía meditando, sufrindo. Loitaba contra os impulsos da carne, o odio ou a envexa e sempre perdía. «Que opcións tiña de salvarse?» Mais un dia volveu a escoitar «creo no perdón dos pecados» e nese intre tivo unha revelación, «sentín como se volvera a nacer«. Cría ter recibido a gracia de Deus, sen facer nada!

Tras proclamar a súa descoberta, comprobou que moita xente coma el, padecía a mesma ansiedade. É máis, nunha viaxe a Roma propuxo a idea de que cada home é un sacerdote, que non depende de ninguén. Nótese que home vén do latín ‘homo‘, ser humano, derivado do sánscrito ‘man‘, co mesmo significado xa que para home-macho empregábase ‘vir‘, varón.

A incipiente revolución xa definira ao seu inimigo. Non era nin a relixión nin os fieis senón o propio pontífice e mailos seus ritos máxicos, o seu proceder. Daquela, cando por fin chegou a Wittenberg a bula papal, Lutero só desexaba facer unha cousa, queimala perante a multitude.

Coa Idea asentada, xordida oportunamente e distribuída grazas á imprenta, a xente comezou a aprender as novas palabras, a propagalas e até acentualas, sobre todo quen pertencía ás novas xeracións con neófitos ás veces máis estritos e intolerantes có propio percusor da Idea. Tal é o caso de Calvino ou das máis de trescentas seitas xordidas tras Lutero. Pero iso xa é outra historia.

Paralelismos

asennadas

En: AGNIX, Amizade, Curiosidades, FLOSS, Historia(s), Pensamento, Persoal por Roberto Brenlla
Sen Comentarios »

Richard Stallman, quen forma parte do comité asesor do Máster de SwL de Caixanova e referente do mundo do software libre,  estará presente en Ourense e en Vigo para impartir conferencias abertas ao público. O acto de Vigo terá lugar no Auditorio do Centro Cultural Caixanova o 30 de Abril ás 16:00h.

O programa da xornada é o seguinte:

• O movemento do Software Libre, por Richard Stallman.
• Entrega dos diplomas aos alumnos da edición 2007/2008.
• O perigo das patentes, por Richard Stallman.

Podes inscribirte á Conferencia de Stallman en Vigo preme aquí.

A foto deste artigo é unha que lle fixen no CESGA durante a súa primeira estadía na nosa comunidade no 2005. Tan grande era esa «aureola» que o propio Stallman incluíuna na súa web na sección «Photos and drawings«.
asennadas

En: AGNIX, FLOSS, Galicia-Galiza, Persoal por Roberto Brenlla
3 Comentarios »

En tempos de crise e até recesión, calquera medida adoptada para reducir gastos é benvida. Sobre todo se é a gran escala e no sector tecnolóxico, onde existen varios xeitos para realizar unha mesma tarefa.

Un estudo recente, publicado no sitio MeriTalk.com e realizado en conxunto con Red Hat e DLT Solutions, analizou o orzamento de 30 axencias federais estadounidenses e concluíu que en tres anos o aforro pode ser de 3,7 mil millóns de dólares co uso de software FLOSS (Free/Libre & Open Source Software), o que abondaría para mercar un smartphone e un notebook novo a cada traballador. Así de rotunda é a fonte desta información, á súa vez apuntando cara estoutra.

Outras prácticas que axudarían a aforrar algúns cartos son a virtualización (13,3 mil millóns de dólares) e o cloud computing (computación en nube), o software-como-un-servizo, nomeadamente SaaS (6,6 mil millóns).

Segundo o estudo dispoñible en PDF, o concepto de «computación en nube» rexeitado polo propio Richard Stallman diminuiría a compra de novos softwares e hardwares, o software de código aberto substituiría ao software privativo e a virtualización permitiría aforrar en servidores.

asennadas

En: AGNIX, FLOSS, Negocios por Roberto Brenlla
Sen Comentarios »

Deixo claro que ese é o título traducido da nova que fai referenza a unha entrevista feita polo fundador da FSF, Richard M. Stallman, ao xornal The Guardian.

A idea de empregar programas baseados na web como o Gmail de Google é «peor ca estupidez«.

O Cloud computing (computación en nube) é «un modelo de computación no que os datos, ficheiros e aplicacións residen en servidores físicos ou virtuais, accesíbeis por medio dunha rede en calquera dispositivo compatíbel. Basicamente, consiste en compartir ferramentas computacionais pola intercomunicación dos sistemas, semellantes as nubes no ceo, ao contrario de ter esas ferramentas localmente (mesmo nos servidores internos)«, segundo a Wikipedia. Este tipo de tecnoloxía está a ter un gran pulo nos últimos tempos grazas ás tecnoloxías de empresas como Google, Micro$oft e Amazon.

Pero Richard Stallman cre que o cloud computing é unha trampa que pretende forzar á máis xente a mercar sistemas pechados e privativos que custarían máis e máis co decurso do tempo.

«É unha estupidez. É peor ca estupidez: é unha campaña de hiper marketiing«, dixo ao xornal.

«Alguén di que isto é inevitable –e cada vez que escoites alguén dicíndoo é como se fose unha campaña comercial para facelo realidade«.

Stallman cre que os usuarios de computadores deberian ser entusiastas á hora de manter as súas informacións nas súas mans no canto de deixalo en terceiras partes.

«Unha razón pola que non deberías usar aplicacións web é que perdes control. É tan ruin como empregar progarams privativos. Fai a túa computación no teu propio computador coa túa copia de programa que respecta a liberdade. Se usas programas privativos ou un servidor de alguén, estarás indefenso. Estás nas mans de quen desenvolve tal software.«

asennadas

En: AGNIX, FLOSS, Tecnoloxía por Roberto Brenlla
2 Comentarios »

Barcelona acollerá do 15 ao 17 de xullo a ‘I Conferencia Internacional sobre o Software Libre‘ como instrumento que favoreza a educación. O evento contará cuns 200 profesionais de administracións públicas, empresas do sector pedagóxico e de ONGs de todo o mundo.

O congreso analizará, entre outros temas, as posibilidades de que o programario libre contribúa a universalizar a educación, a abaratala e a aplicala, polo menos, na educación pública.

A «I Free Knowledge, Free Technology Conference« (FKFT) realizarase no pavillón 5 de Fira de Barcelona Montjuïc, organizada polo Free Knowledge Institute e o proxecto europeo SELF, ao que pertence a Universitat Oberta de Catalunya (UOC), e que coordina o programador holandés Wouter Tebbens.

En declaracións a Europa Press, Tebbens explicou que un dos grandes obxectivos de SELF é a Plataforma do mesmo nome, que consiste nun portal similar ao de Wikipedia, para crear e compartir materiais educativos en liña. O proxecto, impulsado con axuda da Comisión Europea, xa está na súa primeira fase.

Un dos relatores do congreso será o director do departamento de tecnoloxías da información da Xunta de Estremadura, Carlos Castro.

Explicará como esta rexión se converteu nunha das primeiras do mundo en adoptar o programario libre cun plan estratéxico integral que afecta á administración, a incubadoras de empresas e á educación, entre outros ámbitos, explicou Tebbens.

Outros relatores serán o fundador da Free Software Foundation, Richard Stallman; o membro do Consello Nacional de Investigación de Canadá Stephen Downes, especializado en software aplicado a educación; e Karel de Vriendt en representación da Comisión Europea.

A conferencia está organizada polo Free Knowledge Institute e o SELF Consortium, formado polas universidades Oberta de Cataluña e de Goteborg, Internet Society Netherlands, Free Software Foundation Europe, Internet Society Bulgaria, Fundación Via Libre e Tata Institute for Fundamental Research.

Fonte.

asennadas

En: AGNIX, Cultura Libre, Eventos, FLOSS por Roberto Brenlla
Sen Comentarios »

No pasado xoves 22 de maio de 2008 Canal Sur emitiu unha entrevista ao fundador da FSF, Richard M. Stallman. Atopeina en YouTube:

asennadas

En: AGNIX, FLOSS, Internet por Roberto Brenlla
Sen Comentarios »

Algún dia contarei algo de cando o fundador da FSF (Free Software Foundation) Richard M. Stallman estivera na miña casa durante a súa estadía na nosa comunidade, aló polo 2005.

Dígoo porque veño de ler o que comenta un dos fundadores da extinta distro braisleira Conectiva, Rodrigo Stulzer, no seu blog nun artigo titulado «A Terrível Semana em que Richard Stallman Ficou na Minha Casa«. Paga a pena lelo

Atopei ese artigo nesta fonte.

asennadas

En: AGNIX, FLOSS, Persoal por Roberto Brenlla
2 Comentarios »

Deixo traducido un artigo de Hernani Dimantas e Dalton Martins tiulado «A Nova Era da Livre Circulação da Informação, Cultura e Conhecimento – A cultura hacker» referido especificamente á contorna de países do hemisferio sur, os países con pobreza.

Confundidos a propósito polo pensamento conservador como invasores de rede, os hackers somos todos os que actuamos para que informacións, cultura e coñecemento circulen libremente. E esta ética de cooperación, post-capitalista, vaise transvasando do Software Libre para toda a sociedade.

Os hackers xurdiron no ambiente universitario. A cultura hacker ten orixes no MIT (Instituto de Tecnoloxía de Massachussets) e noutros laboratorios norteamericanos, como o PARC da Xerox. O movemento hacker coloca o ser humano no centro do universo e pasa a desenvolver toda unha nova relación para satisfacer esta nova variable. Estas son as persoas do software de código libre, estes son os seres humanos de Linux.

Coas contas saldadas é fácil, moi fácil, romper coas estruturas impostas polo capitalismo. Richard Stallman, o gurú da Free Software Foundation, podía priorizar o desenvolvemento dun driver para unha impressora e crebar os modelos da industria de software. No Brasil el morrería de fame.

As orixinalidades das conversacións que acontecen no baixo hemisferio deben ser analizadas por outro viés. Ser hacker é unha forma de supervivencia. Esa análise despégase da cibercultura e entra nas relacións que acontecen na sociedade brasileira. A colaboración é unha estratexia de supervivencia nas periferias. Non vou alargarme nas perversidades das clases dominantes; voume centrar na forma como os brasileiros descobren un atallo para o futuro.

Internet é a opera prima hacker . Este movemento non vai quedar restrinxido á área tecnolóxica. Ser hacker depende do coñecemento inherente da computación. Ten máis sentido pensar no artífice. Na creatividade do ser humano catalizada pola dixitalización da rede.

É lóxico o debate na sociedade virtual que está osmoticamente invadindo a sociedade establecida. Algúns principios do ser humano están sendo transformados. O novo bo-senso acepta a revolución dixital como propulsora dunha nova orde. Acepta a anarquía como unha forma viable de balance entre os poderes. Acepta que o coñecemento debe ser libre e o dereito das persoas comúns a compartir ese coñecemento. Empresas e gobernos fanse moito máis fráxiles fronte a esa realidade. Construíron un verdadeiro muro de Berlín, que divide a sociedade en castas de opresores e oprimidos, de poderosos e débiles, de produtores e consumidores, do ben e mal. Non creo nunha sociedade tan maniqueísta. A multitude hiperconectada racha á ética protestante que axudou á evolución da sociedade industrial. Na Era do Coñecemento, eses valores deben ser substituídos por outra ética. A proposta da sociedade da información é a ética hacker que está sendo adoptada polo movemento do Software Libre.

Para entender esta ruptura dos paradigmas temos que pensar e participar. Un novo sistema está nacendo. Esqueza o vello mando e control. Está xurdindo unha conciencia inequívoca de que a construción de abaixo cara arriba ten moito para ofrecer para o desenvolvemento do proceso colectivo. Unha sociedade que sobrevive e vólvese a crear na súa propia diversidade.

Crear para a sociedade. Facer acontecer independente do retorno financeiro a curto prazo. Calquera persoa cun computador conectado pode participar voluntariamente en proxectos importantes. Todo cambia. Os nenos aprenden a colaborar, a desenvolver proxectos online e a reflictir os seus soños no ambiente web. O mundo virtual non é diferente do noso bo e querido mundo real. Internet está ensinando os usuarios a se inter-relacionasen neste espazo virtual. Non existe secreto, só boa gana e obstinación. Crear para a sociedade. Facer acontecer independentemente do retorno financeiro a curto prazo. É esta a gran novidade. A metodologia de traballo é simple e virtual. Calquera persoa cun computador conectado na rede e cun pouco de coñecemento ten a posibilidade de participar voluntariamente dalgúns proxectos importantes. Sen dúbida é a mellor opción.

Por detrás deste discurso hacker existe unha filosofía. O coñecemento debe ser libre. É dicir moi diferente da ética protestante, para quen o diñeiro ennobrece ao ser humano. De acordo coa xerga hacker ,»a orixinal ética hacker significa a crenza que compartir a información é un ben un poderoso e positivo.» Na práctica iso significa un deber ético de traballar baixo un sistema aberto de desenvolvemento, no cal o hacker ofrece a súa creación para que outros usen, proben e continúen o desenvolvemento.

Colaboración é a palabra do século 21. Linus Torvalds causou un alboroto enorme ao liberar o código nunha lista de debates. «Release early and release often» ou «Libere axiña [os resultados do traballo] e libere a miúdo» supuxo un redeseño do modelo de produción. Colaboración como capital social. Colaboración para facer calquera cousa que o desexo provoque. Colaboración como condición de supervivencia.

E con estas prerrogativas outra lóxica emerxe das entrañas da rede. Pois a visión tradicional non concorda cos anhelos da rede e das persoas. Estamos buscando o diferencial. A posibilidade de intercambiar informacións, de opinar, de desenvolver os nosos proxectos con liberdade. Utilizar a voz.

Benvido á Era do Coñecemento Libre.

O artigo orixinal.

asennadas

En: AGNIX, Cultura Libre, FLOSS por Roberto Brenlla
1 Comentario »